crazy & stupid is my style

عيش احلى ما في اللحظه

2009-12-12T19:41:00.003+02:00

تخيلو ان الكون ده كله بمجراته اللي ملهاش عد ونجومه اللي ملهاش عد و كواكبه اللي ملهاش عد و احنا البني ادمين اللي ماتو و اللي لسه عايشين و اللي لسه هيجو و اللي ملهمش عد بردو
كلنا كلنا عايش في فيمتو ثانيه او اقل
و كل القرون و العقود و الاسنين و الشهور و الاسابيع و الايام و الساعات و الدقايق و الثواني و فيمتوهات الثواني اللي فاتت وعدت ماضي
و كل القرون و العقود و الاسنين و الشهور و الاسابيع و الايام و الساعات و الدقايق و الثواني و فيمتوهات الثواني اللي جايه مستقبل
اما الحاضر فضايع بين اللي الاتنين
الحاضر مبيلحقش يعيش او يقضي ثانيه الا و يلاقيها سابته مشيت و راحت للماضي و جاتت بدلها ثانية المستقبل اللي هي كمان مبتصدق و تحصل صاحبتها عالماضي

انا هسيبني من الماضي و المستقبل و هخليني عايش و مبسوط بثانية الحاضر قبل ما تسافر عالماضي

انا انسان

2009-11-29T05:18:00.004+02:00

ايقن تماما و اقتنع بفكرة انه ليس بشيطانا
و ان بداخله شخص اخر او نفس اخري لم يخيم عليها الظلام بعد
رغم ذلك لم يترك لغروره العنان معتقدا بانه ملاك
فهو ليس بملاك ايضا
تقبل فكره انه انسان له اوبشناته و ديفوهاته
وان هذه الاوبشنات و الديفوهات هي التي تجعله فريدا من نوعه و مختلف تماما عن الاجناس الاخري
كما ان اختلاف هذه الاوبشنات و الديفوهات و تنوعها هي ما يجعله متميزا بين افراد جنسه
استسلم تماما لهذه الفكره و تقبل طبيعته الانسانيه بل و جعلته هذه الفكره معتزا بطبيعته هذه اكثر و اكثر

انا انسان
الاربعاء 18-11-2009
2:55 pm

امتحان الحياه ...

2009-10-10T10:44:00.001+02:00

حياتنا كلنا عامله زي امتحان اخر السنه. و مش اي سنه . دا امتحان الثانويه العامه وانت العيل الفاشل اللي مقضي طول السنه اكل و مرعى و قلة صنعه . هتلاقي نفسك داخل السنه دي بدون ماحد ياخد رايك او حتي يقولك انك داخل ثانويه عامه . وكان الحياه اللي ادوهالك دي مش بتاعتك . طبعا مش هم اللي جابوك الدنيا دي و صرفوا عليك يبقى انت تفكر و تقرر او تعمل اي حاجه في حياتك ليه باماره ايه.

تاخد في السنه دي 10 شهور اعداد للامتحان بس في الحياه بتاخد 9 شهور بس و لو انت مبخت هيبقوا 7 بس- يلا اهو نخلص من الهم و القرف بسرعه. طبعا سواء كانو 7 او 9 او 10 اكيد مش هتعمل فيهم حاجه لانك زي ما وضحنا فاشل اكل شارب نايم ببلاش و لا انتا واعي للدنيا هم .

و فجاة تيجي اللحظه الحاسمه تلاقي نفسك يا اما بتضرب بالشب علشان يفوقوك و تروح امتحان الثانويه رغم انك مش عايز تروح الامتحان الا انك هتروح غصب عنك طبعا .

نرجع بقى للواقع هتلاقي نفسك بتفوق من حياتك الهادئه و الجميله اللي كنت فيها على افظع الم ممكن تتخيله في حياتك الا وهو الم الضرب على اطري و انعم منطقه في جسمك وقتها.علشان تعيط و تفوق و يعرفو انك عايش وبردو رغم انك مكنتش عايز تنزل من الجنه اللي انت كنت فيها الا انك هتنزل غصب عنك.

تروح الامتحان طبعا مش جاهز . انت كنت مقضيها طيله الشهور اللي فاتت. و اذا بك تفاجا على حين غره بورقه الاسئله . تقرا السؤال الاول واذا به هذا السؤال الوحيد اللي كنت متاكد انه هيجي في الامتحان و بالرغم من انك عارف اللا انك مازاكرتوش.

السؤال الاول(اجباري طبعا و ابقى قابلني لو عرفت تحله):

عرف الاتي- ما هي الحياه؟

اكثر سؤال ساذج و معقد في نفس الوقت . سؤال شيب كتير قبلك و هيشيب كتير بعد علشان يعرفوا اجابته . سؤال كان السبب في تقطيع الكثيرين من جيرانك في اللجنه ورقة الاجابه و مغادرتهم من لجنه الامتحان الي مسواهم الاخير . سؤال كان الدافع للاخرين ( الدحيحه) للاصرار و المثابره في المحاوله على ايجاد حل لهذه السؤال , دول اللي ما بيطلعوش من اللجنه غير بعد نهايه الوقت و عايشين حياتهم عالاخر.

نرجع بقى ليك انت العيل الفاشل الي لا حول له ولا قوه . تعمل ايه علشان تجاوب عالسؤال انت مش مزاكر و لا حتى مبرشم. تقعد تبص حواليك علشان حد يغششك الاجابه متلاقيش طبعا انت عارف السبب . اكيد هتقولي اه عارف لان مفيش حد بغشش حد و اللي هيغششك اول منك بنص درجه .هقولك لا السبب ان مفيش حد عارف الاجابه .مقدامكش حل غير انك تقعد تالف و تلفق اي حاجه و السلام . تقعد تعصر مخك و ذاكرتك في الايام الي فاتت من حياتك.

ساعات تفكر في الحياه على انها نعمه... وتقول لنفسك لو مكنش في حياه .. احنا كنا هنكون عاملين ازاي ... روحك دي مكنتش هتبقى موجوده ازاي ... عقلك اللي شغال تفكير عمال على بطال هيكون فين وبيفكر في ايه..... تتخيل نفسك مش موجود خالص لا حي و لا ميت .. ده حتى الواحد لما يموت روحه بتفضل موجوده امال بقى لما تكون مش موجوده من اساسه ... زي بالظبط انت كنت ايه قبل ما تتولد .. كنت فين ... فكره الفناء تيجي في بالك ترعبك و تخليك تصب عرق من كل حته في جسمك تقول لنفسك انا لقيت الاجابه (الحياه دي نعمه مش بنقدرها غير لما نموت.(

بعد متخلص كتابه الاجابه . الشيطان يلعبلك في مخك و تفكيرك و تشطب الحل الاولاني . تقول لنفسك بس اوقات تانيه كتير بحس ان الدنيا معانداني .. وان الحياه دي لعنه .. و اتمنى لو مكنتش موجود من الاساس ..و ان الحياه لعنه مكتويه على كل واحد اتكتب عليه الحياه ... الحياه حكم مؤبد لأ مدى الحياه اشغال شاقه ... لازم الواحد كل يوم الصبح يصحى من النوم .. لازم ياكل علشان يعيش او العكس مش هتفرق كتير .. لازم يشرب .. لازم ولا مؤاخده يدخل الحمام .. لازم يتجوز .. لازم يشتغل عشان يعرف يتجوز .. لازم يتعلم عشان يعرف يشتغل و يتجوز .. لازم كل يوم اخر النهار ينام .. لازم يحلم .. و لازم الحلم ما يكملش ويصحى من الحلم تاني يوم الصبح عشان يكرر نفس اللي عمله امبارح ..... و هكذا لغايه لما ياخد براءه من سجن الحياه...

تحتار بين الاجابتين ومتعرفش تكتب اي حل من الاتنين و تنسى خالص ان السؤال كان اختيار بين متعدد ( الحياه نعمه - الحياه لعنه - الاثنين معا) او مفيش اجابات صحيحه و هتفضل لغز محدش في اللجنه عارفله حل...

و رغم سهوله السؤال الا ان مفيش حد من اللي معاك في اللجنه عرف حل السؤال غير اللي اللي قطع ورقة الاجابه اول ما يخطي خطوه واحد بره باب اللجنه و يسيبها بمزاجه او غصب عنه و ياخد الحل معاه في قبره و ما يقولش لحد عليه و مرضيش يغشش حد ...

و هنا و من موقعي المتميز كخبير في امتحانات الثانويه العامه احب قولك على نصيحه صغير قبل ما تدخل لجنه الامتحان – اعتبرها برشام صغير – خليك من الدحيحه اللي ما بيسبوش ورقه الاجابه غير بعد الوقت ما يخلص عيش كل لحظه في حياتك علشان السنه متجريش منك احسن ما يجي الوقت اللي تندم فيه على الدرجات اللي انت ضيعتها.

مجرد هذيان ... عمر طاهر.

2009-04-28T03:49:00.006+03:00

هل تَـعلم؟

هل تعلم أن ميزانية خط هجوم الزمالك ثلاثة أضعاف ميزانية مديريات التربية و التعليم فى محافظات سوهاج و قنا و أسوان؟، ومع ذلك فنسبة النجاح فى هذة المديريات أضعاف أضعاف نسبة النجاح فى خط هجوم الزمالك.
هل تعلم أن عدد المشاركين فى التصويت فى ستار أكاديمى و إكس فاكتور ضعف عدد المشاركين فى التصويت فى انتخابات مجلس الشعب الأخيرة؟، وهل تعلم أن عدد الأصوات التى حصل عليها محمد عطية ضعف عدد الأصوات التى حصل عليها الفائز فى انتخابات الرئاسة الأخيرة؟
هل تعلم أن المواطن العادى بنهاية كل عام يكون قد التهم مايقرب من 8 كجم من الإضافات الصناعية للطعام المحفوظ الذى نعيش عليه (بنزوات الصوديوم، ونترات النشادر، ومكسبات طعم ورائحة،و مثبات ،و بكتين الفاكهة، و مستخلص النشادر)؟
هل تعلم أن كل الأمهات المصرية توصى أولادها عند عبور الطريق بأن (ياخدوا بالهم)،فيما عدا نوع واحد من الأمهات (مامة سواق الميكروباص)؟
هل تعلم أن هناك ما يقرب من 500مواطن مصرى يموتون سنويا بسبب خلاف على مبلغ يتراوح بين جنيهين و خمسة عشر جنيها؟
هل تعلم أن قيمة الصك الذى سيحصل عليه المواطن المصرى عندما يتم توزيع صكوك الدولة تقل قيمته كثيرا عن الجائزة التى يقدمها يوميا المفتش كورمبو؟
هل تعلم أن كل ثلاثة مواطنين مصريين يشتركون فى خمسة جنيهات كدخل يومى و عسكرى أمن مركزى؟
هل تعلم أن عدد المصريين الذين يجمعون بين زوجتين مساو لعدد المصريين الذين يجمعون بين وظيفتين إحداهما عضوية البرلمان؟، معروف أن جوز الأتنين يا قادر يا فاجر؟، لكن عمرك أخدت بالك أن جامع الوظيفتين يا فاجر يا تاجر ؟
هل تعلم أن الأخوان ينجحون دائما فى الأنتخابات رغم تنبيهات الحكومة المستمرة و تأكيدها على أن (الدين مابيدخلش فى المجموع)؟

هل تعلم أن دار الأفتاء أصدرت فتوى تبيح زواج المعاقين ذهنيا فى الوقت اللى الناس السليمة مش عارفة تتجوز فيه؟
هل تعلم أن المواطن المصرى يقرأ نصف كتاب فى العام وأكثر من عشرة آلاف لوحة إرشادية (لا تسرع أولادك فى انتظارك).

هل تعلم أن القاهرة الجديدة كانت موجودة فى حسابات الدولة لتعميرها و تحويلها لتجمعات للفقراء؟، هذا طبعا قبل أول ظهور أول ألبوم غنائى لسوزان تميم.
هل تعلم أن القانون لا يوجد به مادة صريحة تجرم الشذوذ أو تبادل الزوجات ولكن به مواد تجرم الرقص ببدلة رقص شرقى غير مطابقة للمواصفات ؟
كانوا فيما مضى يتمسكون بالختان كضمان لعفة البنات و الزوجات خصوصا وأن مقدرة الرجال على المعاشرة تأخذ منحنى هابط بمرور الوقت... هل تعلم أن تجريم الختان جاء تاليا على ظهور إختراع الفياجرا؟

هل تعلم أن خانة"ذكر و أنثى" الموجودة فى البطاقة الشخصية ظهرت بعد قيام عدد كبير من المصريين فيما مضى بتسمية المواليد الذكور بأسماء صالحة للجنسين (عفت..إسلام..رجاء) لمساعدة أولادهم فى الهروب من التجنيد؟، المعروف أن بعد ظهور هذة الخانة تم القبض على عدد كبير من المتهربين والحاقهم بالجيش بينما التحق الباقون بمجلس الشعب.
هل تعلم أن ثمرة الكيوى تجعل المعدة تصدر غازات وزنها خمسة أضعاف وزن الثمرة نفسها؟، الغريب أن سلوك مثل هذا يبدو غريبا من ثمرة رقيقة كالكيوى و أعتقد أنه كان سيبدو مقبولا من ثمرة مثل "الكاكا".
هل تعلم أن عدد المرات التى تهز هيفاء فيها مؤخرتها فى كليب يا ابن الحلال مساوى لعدد المرات التى اهتزت فيها البورصة المصرية خلال السنوات الخمس الأخيرة؟
هل تعلم أن من دواعى الفخر بمصريتى أن الفرنسيون كتبوا "وصف مصر" وماكتبوش وصف فرنسا أبدا؟
هل تعلم أن السبب الرئيسى فى بطء المرور عندنا هو أن مصر " بلد تخينة"، و لذلك منطقى جدا أن يكون البطء الشديد هو المميز لحركتها و هيه بتتقدم بينا؟
هل تعلم أن نسبة ذكر كلمة الحرية فى مواد القانون المصرى إلى ذكر كلمة السجن (1 إلى 1000)؟

هل تعلم أن أدوات النصب هى أن ،لن،كى ،0900؟
هل تعلم أن ضوء الشمس يصل إلى الأرض فى 8 دقائق بينما يصل رئيس الوزراء إلى عمله فى مدة أقل؟
هل تعلم أن أكبر دليل على أن (ربنا مايرضاش بالظلم) هو أن الجودزيلات انقرضت بينما بقيت الفراشات؟
هل تعلم أن وزن الطن من الحديد بعد أن يصدأ تماما يصبح ثلاثة أطنان؟،وهو الأمر الذى يفسر صعوبة إزاحة الكثيرين من المسئولين عن مواقعهم !
هل تعلم أن الفائز بمقعد "العمال" فى مجلس الشعب يعيش غالبا عيشة "الملوك"؟
هل تعلم أن المصريون يؤمنون بأن " الأعمار بيد الله" ،لكنهم يؤمنون أيضا بأن " ابن الهبله يعيش أكتر"؟
هل تعلم أن مصر لم تعرف التفرقة العنصرية فى تاريخها إلا على يد قبيلة الإلتراس بعد ظهور شيكابالا فى نادى الزمالك؟
هل تعلم أن محمد على عندما كون الجيش المصرى فى القرن قبل الماضى ألف فرقة من الجنود المشاة من الصم و البكم؟..أعتقد أنها كانت الإرهاصة الأولى لسلاح الإشارة! (مع كامل تقديرى للجيش المصرى العظيم).
هل تعلم أن مصل عضة الكلب مصنوع من أنسجة القرود وأن الصندوق الأسود لونه برتقالى أصلا و أن الأوراق النقدية مصنوعة من القطن و ليس من الورق و أن الأنسان على الرغم من أنه من الثدييات فأنه أحيانا (يبيض)؟

عمر طاهر

ح يبان --- خالد كساب

2009-04-13T23:33:00.012+02:00

معقولة؟! هل من الممكن أن يكون كل ما يحدث علي الاّن علي سطح الكوكب مجد بروفه
جنرال للبشريه بينما العرض الرئيسي لم يبتدئ بعد؟! وإذا كان من حق كل فنان أو مشخصاتي أو راقص أو موسيقار أن يقوم بعمل بروفه جنرال علي العرض بتاعه قبل عرضه علي الجمهور .. فلماذا لم تحصل البشريه علي هذا الحق البسيط.. حق تجربه أدوارهم في العرض مره واحدة..مره واحده يتيمة قبل بداية العرض مرة تؤهلهم لمعرفه أخطاءهم وتداركها هنا الأداء كان :أوفر".. نهدية شوية.. هنا الأداء كان "فاتر".. نسخنه شوية.. هنا المفروض كنت أعمل كده.. هنا مكانش المفروض أتصرف كده.. وهكذا .. ولكن هذا ما لم تحصل عليه البشريه أبدا حق أداء بروفه جنرال علي العرض قبل بدايته.. ولكن (لكن تانيه .. غير الأولانية) من أدرانا أننا لم نحصل علي حق اّداء البروفه بالفعل؟ من أدرانا أن ما نفعله كل يوم من أول ما بنصحي الصبح لغاية ما بننام باليل ما هو إلا جزء من تلك البروفه الجنرال للبشرية؟!
تلك البروفه الني سوف يتم بعدها "فلترة" البشرية.. ليذهب العاديون والعامه إلي
صفوف الكومبارس.. ويذهب العباقره والفنانون والمختلفون إلي صفوف الأبطال لنبدأ الحياه مرة أخري.. بس علي نضيف.. بدون حروب أو خيانه أو نفاق أو شر؟!

إحتمال.. مين عارف؟!

طيب هل تكون البروفه قد إنتهت بالفعل ما حدوث مثل غرق قارة أطللانطس.. أو طوفان نوح مثلا.. ونحن قد إنتقلنا بالفعل إلي البث الحي المباشر وخلاص .. وهو العادي والطبيعي والذي نتصوره جميعا ونعيش علي أساسه ؟

ممكن!

يتبقي أمامنا في تلك احتمال ثالث لا رابع له.. وهو أن تكون البروفه قد
انتهت.. والعرض كمان قد انتهي.. وما نعيشه الاّن ليس سوي مجرد تسجيل لشريط حياتنا.. لما فعلناه بالفعل .. وعيشناه ومررنا به .. ونجحنا أو فشلنا فيه.. بمعني أصح.. ليه مانكونش دلوقتي بنتحاسب ؟! وحتي يكون الحساب دقيقا نفعل نفس ما فعلناه قبل ذلك –كنوع من انواع التذكر-وربما كان هذا هو التفسير المنطقي الوحيد للظاهر التي نعرفها بإسم
“déjà vu”

والتي نشعر فيها بإننا شاهدنا نفس المشهد قبل ذلك.. أو سمعنا أو قولنا نفس الجمله من قبل.. أو صدر منا نفس رد الفعل إذاء نفس الموقف .. أو عشنا نفس تلك اللحظه ربما يكون التفسير الوحيد لتلك الظاهره إننا بالفعل عشنا نفس الموقف من قبل .. وما تلك الحياه سوي إعادة لكل ماحدث؟!
ربما.. ليه لأ؟!

تلك هي الإحتمالات الثلاث للحياه..حد فيكم عنده إحتمال رابع؟!
عموما..وأياً كان ما نعيشه.. بروفه جنرال أو عرض حي أو مباشر أو مجرد تسجيل وإعادة للعرض.. أيا كان .. هل نملك شيئا سوي مواصلة التنفس ومراقبة عقارب الساعات الرهيبة أثناء دورانها الرهيب والذي لا يتوقف ولا ينتهي.. وبالرغم من أن ما نتحدث بشأنه أبعد ما يكون عن مقولة"ياخبر النهارده بفلوس.. بكره يبقي ببلاش".. إلا إننا لا نملك سوي الإنتظار.. ثم الإنتظار.. ثم الإنتظار!
برفه.. عرض حي .. إعادة عرض.. أياً كان ..حَيبان!

عمي / خالد كساب
طبعا

لو كنت اختار.... لاختار الشمس

2008-11-02T13:20:00.008+02:00

وسط البلد

لو كنت أختار
أختار الشمس
أختار النور
فى ضلام اليأس
و أحلم بنهار جواه مشوار
و قلوب بتحس
لو كنت أختار
أختار الشمس
لو كانوا سألونى فى يوم عنى
لو كانوا خلونى أعيش سنى
كنت أملا الدنيا بأفراحى
ولحد الفجر أفضل صاحي
أعيش على الاحلام بس
لو كنت أختار
أختار الشمس
أيام فاتت ضاع فيها إسمى
ولامرة يادنيا بتبتسمى
دلوقت بكون فى حروفى

بايديا هدمت جبل خوفى
ولا سامع للاحزان حس
لو كنت أختار

أختار الشمس

اتكلموا....

2008-10-29T23:31:00.004+02:00

الـكلمة أيد ، الـكلمة رجـل ، الـكلمة باب ،

الـكلمة نجمـه كهربيــه فى الضبـــاب

الـكلمة كوبـرى صـلب فـوق بحر العباب ،

الجـن يا أحبــاب ، ما يقــدر يهدمــه

فــاتــــكلموا...

تاتي الرياح بما لا تشتهي السفن..

2008-10-27T13:27:00.004+02:00

goog

لو المقوله اللي فوق دي صح ... بقى انا مقضي حياتي كلها قبطان سفينه في بحر الحياه اللي دايما كله رياح و اعاصير..

مش عارف ليه الحياه دايما بتخبيلنا مفاجأت و اوقات كتير بتكون مفاجأت بايخه !!!!! و الا ما تكونش حياه...
الحياه دايما ما بتكملش ... محدش يقول ان الحلو ما بكملش و بالتالي الحياه حلوه ..
هقولكو ان الحلو لما ما بكملش بكون وحش ... الحلو علشان يكون حلو لازم يكون كامل ... لما بنحب حاجه عيوبها بتتحول الى مميزات ....
القمر بمون حلو لما بيكون بدر كامل...

و سلملي على الطاقه الايجابيه ....

الانتظار .....

2008-10-26T16:18:00.007+02:00

كم اعشق الانتظار...

الانتظار ده لذه غريبه زي ما بيقول طه حسين الم لذيذ او لذه مؤلمه..
يمكن لان دي الحاجه الوحيده اللي بلاقي نفسي فيها .. يعني عايش حياتي بجد..
طول عمري و انا مستني حاجه ... وانا صغير كنت بستنى يوم الاجازه علشان العب ... لما كبرت كنت مستني الثانويه العامه تخلص ... مستني الكليه تيجي ... و برده مستنيها تخلص ... مستني فيلم يبدأ عالتليفزيون ... مستني مكالمه من حد... مستني الدونلود يخلص ... مشتني القطر يجي ... مستنيه يوصل .. مستني حب جديد ... يوم جديد ونهار جديد او ليل جديد ... مستني اب مسافر.. ده غير حاجه مستنيها تيجي ومش عرف هيه ايه ...
المهم انا دايما مستني...
المهم ان الحاجات دي بتيجي فعلا بس بتخلص بسرعه ....
و تبدأ من جديد رحله انتظار الحاجه اللي بعدها..
الانتظار ده حاجه حزينه جداا .. ما انصحكوش بيه .. اللي مستني حاجه يقزم يجيبها لنفسه ما يضيعش و قته...

لذه الانتظار

السم و الترياق..

2008-10-26T16:00:00.006+02:00

انا الذي عمري اشتياق في اشتياق..

و قطر داخل في محطه الفراق..
قصدت نبع السم و شربت سم ..
من كتر شوقي و عشمي في الترياق...

جاهين !!!

كلام الورق.

2008-10-26T15:56:00.006+02:00

عجبتني كلمه من كلام الورق..
النور شرق من بين جنابها و برق..
حبيت اشيلها في قلبي .. فالت ..
حرام....
ده انا كل قلب دخلت فيه اتحرق ..

جاهين !!!!

مش بعرف اكتب.....

2008-10-26T15:45:00.002+02:00

يا جماعه انا ما بعرفش اكتب..
انا بس بحاول اكتب اي خواطر باي اسلوب...
ف يا ريت ما تزعلوش لو كانت معظم الحاجات المكتوبه في المدونه عباره عن مفالات لكتاب معروفين..
و انا اكيد هاكتب اسم الكاتب ..
و لو ما كتبتش اعلرفو ان انا اللي كاتبها...
شكرااااا

فيلم حياتي

2008-10-20T16:26:00.001+02:00

حياة كل واحد فينا عامله زي فيلم طويل.....

وكل واحد و فيلمه .. اللي كوميدي و اللي دراما و اللي اكشن ... او حتى خيال علمي...

الواحد مننا بتفرج على النوع اللي بيحبه من الافلام ... بس للأسف مبيقدرش يختار فيلم حياته هيكون عامل ازاي..

اوقات كتير بيكون فيلم حياته مش عاجبه.. علشان كده بيهرب من الواقع للحلم او الخيال...او حلم حياته بمعنى اصح..

يعمل فيه اللي هو عاوزه .. يكتب سيناريو على مزاجه .. يختار الاشاص اللي عايزها و يمسح اللي مش عاجبه .. بيختار ابطال الفيلم يعني..ويحط الاحداث زي ما هو عايز ويعيش حياته .. قصدي يعيش حلمه..

الشخص المحظوظ وحده هو اللي بيقدر يحقق حلمه و يعيش حياته زي ما كان مخط لها بالظبط .. يتخرج من الكليه اللي هو عايزه .. يتجوز اللي بيحبها .. يشتغل شغلامه بيحبها..

بيكون عايش حياته كانه عام خيالي حلم هو مختاره بنفسه.. زشي ما تقول فيلم خيالي ( يعني كده و كده )....

البدايه....

2008-10-11T19:32:00.000+02:00

السلام عليكم
ازيكو
دي اول حاجه بكتبها ف المدونه
هي جات متاخره بس معلش
يارب تستمتعوا